Historia

Historia fupi ya Halmashauri Wilaya Ikungi.

 Tarehe 02, Machi, 2012 Mhe. Dr. Jakaya Mrisho Kikwete Rais wa Jamhuri ya Muungano wa Tanzania kupitia GN Na. 73 alitangaza kuundwa kwa Wilaya ya Ikungi na tarehe 03 Mei, 2013 Mhe. Mizengo Kayanza Pinda Waziri Mkuu kupitia GN. Na. 96 alitangaza kuanzishwa Rasmi kwa Halmashauri ya Wilaya ya Ikungi. Halmashauri ya Wilaya ya Ikungi imetokana na Halmashauri ya Wilaya ya Singida. Halmashauri ilianza rasmi kutekeleza majukumu yake mnamo tarehe 01/07/2013.Na ilianza kulipa watumishi wake mishahara kupitia kasma 84R5  tarehe 30/4/2014 kabla ya hapo watumishi walikuwa wanalipiwa kwenye kasma 84r1 ambayo ni Halmashauri ya Wilaya ya Singida.

Maelezo mafupi kuhusu Halmashauri ya Wilaya Ikungi

Halmashauri ya Wilaya Ikungi ni miongoni mwa Halmashauri 6 za Mkoa wa Singida. Halmashauri hii ipo kati ya nyuzi 4⁰ na 6⁰ Latitudo kusini mwa Ikweta, nyuzi 34⁰ na 35⁰ Longitudo Mashariki mwa Greenwichi. Hupata mvua ya wastani wa mm 600-700 kwa mwaka na joto kati ya 15^oC-30^oC^.

Inapakana na Mkoa wa Tabora (Wilaya ya Uyui)  upande wa Magharibi, Manispaa ya Singida upande wa Kaskazini, Wilaya ya Singida upande wa Kaskazini-Mashariki, Wilaya ya Iramba upande wa Kaskazini-Magharibi, Mkoa wa Dodoma (Wilaya Chemba) upande wa Kusini Mashariki na Wilaya ya Manyoni upande wa Kusini.

1.1  Utawala

Halmashauri ina eneo la kilomita za mraba 8,860 Km²  ikiwa  imegawanyika katika majimbo 2 ya Uchaguzi, Jimbo la Singida Magharibi na Jimbo la Singida Mashariki. Aidha Wilaya ina Tarafa 4, Kata 28, Vijiji 101, Vitongoji 545 na Kaya 53,367. 

    Jedwali 1:  Idadi ya Tarafa, Kata, Vijiji na Vitongoji

1.2       Idadi ya watu

Halmashauri ina wakazi wapatao 272,959 (Sensa 2012) kati ya hao wanaume ni 136,178 sawa na asilimia 49.9% na wanawake ni 136,781 sawa na asilimia 50.1%.  Wastani waongezeko la watu  ni asilimia 2.4 kwa mwaka, wastani wa idadi ya watu ni kati ya 5 hadi 6 kwa kaya. Kwa mwaka 2017 idadi ya watu inakisiwa (Projection) kuwa ni 309,030 wanaume  154,174 (49.8%) na wanawake 154,8578 (50.2%).

1.3       Shughuli za kiuchumi.

Asilimia 85 ya Wakazi wa Ikungi wanategemea Kilimo na ufugaji kama shughuli kuu ya kiuchumi na pato lao kwa mwaka  ni Tshs 720,000/=kwa mtu mmoja. 

Mazao ya chakula yanayo limwa ni Mtama, Uwele, Mahindi, Mpunga, Ulezi, Viazi vitamu, Muhogo na Karanga na ya biashara ni Alizeti, Pamba na Ufuta.

Kwa upande wa ufugaji wakazi wa Ikungi wanafuga Ng,ombe, Mbuzi, Kondoo, Punda, Nguruwe na Kuku.